WEDI CWYMPO.

Yr wythnos ddiweddaf cyrhaeddodd newyddion trist y dref fod milwr ieuanc wedi colli'r dydd ar faes y frwydr yn Ffrainc. Derbyniodd Mrs Margaret Owen, New Street, y newydd fod ei mab ieuengaf, Private Hughie Carreg Owen, wedi syrthio yn aberth i gynddaredd y brwydro, a'i fod wedi ei gladdu yn mro estronol Ffrainc.

Nid oedd y llanc addfwyn ond 25 mlwydd oed. Ymunodd yn gynar a'r fyddin, a bu yn aros i ymarferu yn ngwahanol fanau yn Lloegr cyn myned o hono drosodd i wynebu ei dynged olaf.

Yr oedd yn ddyn ieuanc tyner ei natur, ac yn garedig wrth reddf. Addfwynder ei fywyd a lledneisrwydd ei ymarweddiad a'i gwnaeth yn eilun i'r lluaws. Ceid ef bob amser yn dawel a thangwefeddus mewn cwmni, ac ni welid gwg un amser ar ei ael, na gweniaeth yn llechu yn nghymdogaeth ei galon dyner.

Hiraeth a erys yn ddwfn yn mynwes ei gyfoed am y cyfaill y machludodd ei haul mor gynar.

Y nef fo'n drugarog wrth ei fam yn ei thrallod blin am dano.

Yr Udgorn 24/10/1917