MARW PEIRIANYDD DEWR.

Fel yr hysbyswyd yn fyr yr wythnos ddiweddaf am farw cynar y cyfaill ieuanc dymunol Mr John William Jones, Peirianydd, mab Mr a Mrs D. Lloyd Jones, Watchmaker, mewn ysbyty yn Marseilles, Ffrainc, derbyniodd y teulu lythyr yn rhoi pob gwybodaeth posibl modd y daeth ei yrfa ddaearol i ben mor ddisymwth.

Yn ôl y llythyr a gaed ymddengys ddarfod iddo gael ei gymeryd yn wael yn yr agerlong, a symudwyd ef i ysbytty, o dan ofal specialist, ond bu farw er pob ymgais posibl o'i eiddo i adfer ei fywyd. Cafodd gladdedigaeth anrhydeddus, a rhoes criw y llong ddwy flodeu-glwm hardd ar ei fedd, a chyfranwyd ganddynt i roddi careg i nodi man ei orweddle.

Gadawodd ei gartref nos Wener y Groglith mewn iechyd a hoen perffaith, ac addewidion gwyn fel sêr gobaith yn llanw gwybren ei ddyfodol, ond yn ddirybudd "gostyngwyd ei nerth ar y ffordd byrhawyd ei ddyddiau," a chreodd y newydd dristwch mawr wrth feddwl fod, loewed athrylith wedi diffodd mor foreu ar randir Ffrainc. Mor sydyn oedd yr alwad fel y gellid dweyd iddo ymron weled marwolaeth, ond na phrofodd mohono. Cerddodd megis yn ei ddillad gwaith, heb ol brys arno, yn hamddenol i dragwyddoldeb, a gwrid prydferth naw ar hugain haf ar ei wedd.

Gan hyny ni chafodd ei deulu a'i gyfeillion agosaf iddo - pan ddaeth y newydd gwir amdano - egwyl i ymgynefino a'r syniad hyd yn hyn fod Johnnie Williams yn ei fedd!

Rhoes Ffrainc gyfran o'i thir yn lletty noswyl iddo yn ad-daliad am ei ddewrder dihafal flwyddyn yn ôl yn achub criw llong perthynol iddynt rhag dyfrllyd fedd. Cafodd ganddynt fathodyn a thystysgrif yn gof am yr amgylchiad.

Yr oedd yn ŵr ifauc gobeithiol fel peirianydd medrus, a llwydd megis yn cynyg ei llawryfon goreu iddo. Meddai bersonoliaeth ddenol, a gwelid ar unwaith yn ei gwmni ei fod yn ddoeth a chynit ei ddawn. Ni cheid ynddo fost nac ymchwydd hunanol, ond gwir haeddiant i hawliau dynoliaeth oreu ar y person unigol. Ni allai oddef coeg-ddigrifwch, er sirioled ei natur, os byddai i hwnw fychanu synwyr a moes. Hawdd ydoedd canfod oddiwrth ei ystum ei fod wedi penu cynllun ei oes gan mor ddiwyro y cadwai yr hyn a enillodd trwy ddyfalwch ac ymchwil. Er mordwyo y weilgi lydan, a chymdeithasu a bywyd cudd y gwledydd, cadwodd ei wisg yn Iân a'i gymeriad yn ddilychwin. Anwylyn yn mysg ei gyfoed ydoedd, ac anhawdd fydd i'w gyfeillion beidio hiraethu am y cyfaill tirion a noswyliodd mor gynar, ac addewid mor wych am oes mor ddefnyddiol iddo.

Gall ei deulu ymdawelu heddyw am fod un mor anwyl iddynt wedi glanio i fyd na welsom nac adfyd yn oesoesoedd. Gellir dweyd am dano, fel am arall tebyg :

"Ei dderbyn ga'dd i harbwr
Heb don ar wyneb y dwr."

Cydymdeimlwn yn ddwys a'i deulu trallodus yn ymchwydd yr ystorm.

Yr Udgorn 25/04/1917